نړیوال بانک افغانستان کې خپلې څلور سترې پروژې ودرولې

نړیوال بانک په افغانستان کې د نجونو د ښوونځیو د تړل کېدو په غبرګون کې خپلې څلور سترې او مهمې پروژې ځنډولې دي.

د جمهور خبري آژانس د خبر له مخې نړیوال بانک وايي، دوی غوښتل د ۶۰۰ میلیون ډالرو په ارزښت دغه څلور پروژې پلي کړي خو دا چې هلته د نجونو ښوونځي تړل شوي نو دوی هم دغه پروژې لغوه کوي.

دغه بانک ټینګار کړی، چې دوی له نړیوالو بنسټونو سره په اړیکه کې په افغانستان کې فعالیتونه ترسره کوي، خو که د نړیوالې ټولنې غوښتنې په افغانستان کې نه منل کېږي نو دوی هم د ورته پروژو له عملي کولو په شا کېږي.

دا پروژې چې د افغانستان د بیارغونې د صندوق له پیسو څخه تمویلېدلې او د ملګرو ملتونو ادارو تطبیقولې، د کرنې، پوهنې، روغتیا او د کورني معیشت په برخو کې وې.

نړیوال بانک تر دې وړاندې ویلي وو، چې په افغانستان کې به ځينې پراختیايي پروژې پیلوي خو دا پروژې به د افغان حکومت پر ځای د خیریه موسسو له لوري عملي کېږي.

د یادونې ده، چې د نجونو پر تعلیم د طالبانو له بندیز وروسته امریکايي چارواکو په دوحه کې له طالبانو سره پلان شوې غونډې لغو کړې.

جمهورخبري آژانس:کابل