په تخار کې يو پخوانى سرتېرى دطالبانو له خوا ونيول شو

په تخار کې ځايي سرچينې وايي، چې په تالقانو ښار کې يو پخوانى سرتېرى د طالبانو له خوا نيول شوى دى.

د سرچينې د معلوماتو له مخې، دغه پخوانى سرتېرى فريدون نومېده. نوموړی څلور ورځې وړاندې د طالبانو د استخباراتي کړیو له خوا نیول شوی او زنداني شوی و.

سرچينې زياته کړې، چې دغه پخوانى سرتېرى د طالبانو له خوا سخت شکنجه شوى دى.

ویل کېږي چې فریدون د تخار د ملي امنیت په ریاست کې د سرتېري په توګه دنده ترسره کوله.

دا په داسې حال کې ده چې طالبانو په تېرو دوه نیمو کلونو کې د دغې ډلې د مشر د عمومي بښنې سربېره سلګونه پخواني سرتېري بندیان کړي، شکنجه کړي او حتی وژلي دي.

خبرگزاری جمهور