د طوطي میدان د ګازو د اکتشاف او استخراج پروژې د عملي کار پیل

د طالبانو اقتصادي دفتر د طوطي میدان د ګازو د اکتشاف او استخراج پروژې د عملي کار پیل اعلان کړ.

د جمهور خبري آژانس د خبر له مخې د طالبانو د اقتصادي دفتر د رسنیو دفتر نن یکشنبې (د وږي ۲۳ مه) په یوه اعلامیه کې وویل چې ملا عبدالغني برادر د طوطي میدان د ګازو د اکتشاف او استخراج پروژې د عملي کار پرانیسته کړې ده.

ملا برادر د ګازو دا ساحې د پانګونې په برخه کې یو مهم ګام وګڼلو او ویې ویل چې په دومره لویو او مهمو پروژو کې پانګونه ټولو هیوادونو او پانګوالو ته یو روښانه پیغام دی چې په افغانستان کې امنیت ډاډمن شوی او ځمکه د هر ډول پانګونې لپاره مناسبه ده.

هغه زیاته کړه: دا پروژه به د ګڼ شمېر هیوادوالو لپاره د کار فرصتونه رامینځته کړي، په لویه کچه به د ګازو لپاره کورني اړتیا پوره کړي، د هیواد په وارداتي ګاز او بریښنا تکیه به کمه شي، او په تدریجي ډول به بهر ته د ګازو د صادراتو لپاره زمینه برابره شي.

ملا عبدالغني برادر وویل: دا پروژه به تر یوې اندازې پورې د سوداګرۍ توازن کې هم مرسته وکړي او په ټولیزه توګه به د هیواد په اقتصادي وده کې مهم رول ولوبوي.

د طالبانو د اقتصادي چارو مرستیال یو ځل بیا په ټولو کورنیو او بهرنیو پانګوالو او سوداګرو غږ وکړ چې په افغانستان کې پانګونه وکړي او د هیواد له پرتلیزو ګټو څخه ګټه پورته کړي.

طالبانو د طوطي میدان د ګازو د اکتشاف او استخراج پروژې له قراردادي څخه هم وغوښتل چې خپل فعالیتونه په غوره ممکنه لاره ترسره کړي، ټول موجوده معیارونه او اصول په پام کې ونیسي.

جمهورخبري آژانس