جاپان به د ژمي څخه مخکې افغانانو سره مرسته وکړي

په کابل کې د جاپان سفیر د طالبانو د کډوالو او راستنیدونکو چارو وزیر سره په یوه غونډه کې وویل چې هیواد به یې د ژمي څخه مخکې افغانانو سره مرسته وکړي.

د جمهور خبري آژانس د خبر له مخې د طالبانو د کډوالو او راستنیدونکو چارو وزارت نن پنشنبې (د وږي ۲۰ مه) په یوه بیان کې وویل چې وزیر مولوي عبدالکبیر په کابل کې د جاپان له سفیر تاکایوشي کورومایا سره د خدای پاماني لیدنه وکړه.

د کابل او ټوکیو ترمنځ اوږدمهاله اړیکو ته په اشارې سره، هغه وویل چې جاپان په تیرو څلورو کلونو کې افغانانو ته په ملیونونو ډالر بشري مرستې ورکړې دي او د ژمي څخه مخکې به اړمنو ته هم مرستې ورکړل شي.

هغه وویل چې د جاپان حکومت به په افغانستان کې د عامه ګټو یو شمیر پروژې ترسره کړي.

مولوي عبدالکبیر وویل چې د طالبانو امارت له نړۍ سره مثبتې اړیکې غواړي او د طالبانو رژیم په تیرو څلورو کلونو کې خپلې ژمنې پوره کړې دي.

جمهورخبري آژانس