اندیشه: شیعه ټولنه د طالبانو لخوا د سیستماتیک بریدونو هدف ده

د ملګرو ملتونو د بشري حقونو شورا کې د افغانستان استازي خبرداری ورکړی چې په افغانستان کې مذهبي او قومي اقلیتونه، په ځانګړې توګه شیعه ټولنه، د طالبانو لخوا د سیستماتیک بریدونو هدف دي.

د جمهور خبري آژانس د خبر له مخې نصیر احمد اندیشه، تیره شپه (د وږي ۱۷ مه) په جینوا کې د دې سازمان د بشري حقونو شورا په ۶۰مه غونډه کې وویل: په افغانستان کې مذهبي او قومي اقلیتونه، په ځانګړې توګه شیعه ټولنه، د طالبانو لخوا د سیستماتیک بریدونو هدف دي.

هغه زیاته کړه: دا بریدونه نه یوازې په عبادت ځایونو کې، بلکې په تعلیمي مرکزونو او د دې اقلیتونو د استوګنې په سیمو کې هم دوام لري او د پراخې ویرې او ظلم فضا یې رامینځته کړې ده.

د اندیشه په وینا، دا اقدامات، د خپل سري نیولو، شکنجې او په عامه ژوند باندې د سختو محدودیتونو سره، د دې اقلیتونو د له منځه وړلو او له ټولنې څخه د ګوښه کولو لپاره یوه منظمه پالیسي په ګوته کوي.

په جینیوا کې د ملګرو ملتونو د بشري حقونو شورا کې د افغانستان استازې خبرداری ورکړ چې د ځینو سیمه ییزو هیوادونو لخوا د طالبانو د عادي کولو پروسه په افغانستان کې د بشري حقونو بحران لا پسې خرابوي.

هغې ټینګار وکړ چې دا پروسه یو استبدادي رژیم ته مشروعیت ورکوي او د ښځو، نجونو، او مذهبي او قومي لږکیو لپاره ستونزمن شرایط پیچلي کوي.

اندیشه په نړیواله ټولنه غږ وکړ چې د دې پروسې د بندولو او په افغانستان کې د بشري حقونو د ساتنې لپاره بیړني او همغږي اقدام وکړي.

جمهورخبري آژانس