طالبانو او ایران د افغان بندیانو د لیږد د پروسې د بیا پیلولو په اړه بحث وکړ

په تهران کې د طالبانو د سفارت مشر او د عدلیې وزارت کې د بشري حقونو او نړیوالو چارو مرستیال له هغه هیواد څخه د افغان بندیانو د لیږد د پروسې د بیا پیلولو په اړه بحث وکړ.

د جمهور خبري آژانس د خبر له مخې په تهران کې د طالبانو سفارت نن دوشنبې (د وږي ۱۰مه) په یوه اعلامیه کې وویل چې د سفارت مشر فضل محمد حقاني د ایران د اسلامي جمهوریت د عدلیې وزارت کې د بشري حقونو او نړیوالو چارو مرستیال او د محکومینو د لیږد د کمیټې له مشر عسکر جلالیان سره ولیدل.

په دې غونډه کې، دواړو خواوو له ایران څخه افغانستان ته د بندیانو د لیږد د پروسې د بیا پیلولو په اړه بحث وکړ او د قانوني همکارۍ په پیاوړتیا یې ټینګار وکړ.

د یادونې وړ ده چې په ایران کې له ۸۰۰۰ څخه ډیر افغانان بندیان دي.

جمهورخبري آژانس