ریچارډ بینټ: افغانستان د خپلو ډیرو وګړو لپاره خوندي نه دی

د افغانستان لپاره د ملګرو ملتونو د بشري حقونو شورا ځانګړی راپور ورکوونکی وايي افغانستان د خپلو ډېری وګړو لپاره خوندي نه دی.

د جمهور خبري آژانس د خبر له مخې ریچارد بینټ، نن شنبې  (دوږي ۸مه) په خپله اېکس پاڼه لیکي، افغانستان د ډیرو لپاره خوندي نه دی او زه له پاکستان څخه غوښتنه کوم چې له هغه هیواد څخه د افغان کډوالو ایستل ودروي او د دوی نړیوال قانوني مکلفیتونو ته درناوی وکړي.

هغه د افغان کډوالو ملاتړ کونکو هیوادونو څخه وغوښتل چې د دوی د بیا میشتیدنې لپاره ډیرې لارې پرانیزي او د پاکستان او نورو ګاونډیو هیوادونو لپاره خپل ملاتړ زیات کړي چې د ملیونونو افغان کډوالو کوربه توب کوي.

بینټ، د پاکستان څخه د کډوالو د ایستلو په اړه اندیښنه څرګنده کړه، په شمول د هغو کسانو چې د نوم لیکنې کارتونه لري او د سپتمبر له لومړۍ نیټې څخه د اخراج سره مخ دي، ټینګار وکړ چې د دې پروسې دوام کولی شي یو پراخ بشري بحران رامینځته کړي او د افغان کډوالو په وضعیت اوږدمهاله منفي اغیزې ولري.

د یادونې وړ ده چې د ملګرو ملتونو د کارپوهانو یوې ډلې مخکې د پاکستان د هغې پریکړې په وړاندې خبرداری ورکړی و چې د سپتمبر له لومړۍ نیټې څخه به د افغان کډوالو ډله ییز اخراج پیل کړي، او ویلي یې وو چې دا اقدام کولی شي د ملیونونو خلکو ژوند او آزادۍ له خطر سره مخ کړي.

کارپوهانو وویل چې په پاکستان کې په ملیونونو افغانان د یو ژور بشري بحران سره مخ هیواد ته د بیرته ستنیدو په درشل کې دي، چیرې چې له دریو ملیونو څخه ډیر خلک بې ځایه شوي او ښځې او نجونې د زده کړې، کارموندنې او د تګ راتګ آزادۍ په ګډون له خپلو ډیرو اساسي حقونو څخه بې برخې دي.

جمهورخبري آژانس