IOM: په افغانستان کې د راستنیدونکو او د اقلیم بدلون څخه اغېزمنو کډوالو د ملاتړ لپاره اوږدمهاله پلانونه لرو

په هرات کې د مهاجرت نړیوال سازمان (IOM) د دفتر مشر د طالبانو له والي سره په لیدنه کې وویل چې دا اداره د افغان کډوالو د راستنیدو او د اقلیم بدلون څخه اغیزمنو شویو کسانو د ملاتړ لپاره اوږدمهاله ملاتړ پلانونه لري.

د جمهور خبري آژانس د خبر له مخې، په هرات کې د طالبانو د والي د رسنیو دفتر نن سې شنبې (د زمري ۱۴مه) په یوه بیان کې وویل چې د مهاجرت نړیوال سازمان (IOM) د دفتر مشر د یوه پلاوي په مشرۍ د هرات ولایت له والي اسلام جار سره ولیدل.

د مهاجرت نړیوال سازمان د دفتر مشر وویل: دا اداره هڅه کوي چې د راستنیدونکو د بیرته راستنیدو پروسه اسانه کړي، بیرته راستنیدونکي خپلو اصلي ځایونو ته ستانه شي او د اقلیم بدلون څخه اغیزمنو شویو کسانو لپاره اوږدمهاله ملاتړ پلانونه لري.

د هرات والي د کډوالۍ نړیوال سازمان (IOM) د دفتر د مشر د سفر هرکلی وکړ او د راستنیدونکو کډوالو لپاره د اړینو اړتیاوو په پوره کولو کې یې د همکارۍ د پراخولو غوښتنه وکړه، هیله یې څرګنده کړه چې دا سفر به کډوالو ته ډیرې اسانتیاوې برابرې کړي او د افغانستان ریښتینی انځور به نړیوالې ټولنې ته وړاندې کړي.

والي د اقلیم بدلون او تیرو جګړو ته د کډوالۍ اصلي لاملونه په ګوته کړل، او ویې ویل چې د دې ننګونو حل د پرمختللې کرنې، عصري څارویو او قوي صنعت په پراختیا کې دی.

جمهورخبري آژانس