خیریه موسسو په تیر کال کې له یو ملیارد څخه ډیرې افغانۍ اړمنو خلکو ته ویشلي دي

د هیواد خیریه موسسو په تیر کال کې په افغانستان کې له یو ملیارد څخه ډیرې افغانۍ اړمنو خلکو ته ویشلي دي.

د جمهور خبري آژانس د خبر له مخې طالبانو د عدلیې وزارت نن شنبې (د زمري په ۱۱مه) په یوه اعلامیه کې وویل چې له وزارت سره راجستر شوي خیریه موسسو له دې ډلې سره په همغږۍ کې په ټول هیواد کې اړمنو خلکو ته د مرستې رسولو لپاره له یو ملیارد او ۱۱۰ ملیون څخه ډیرې افغانۍ، له ۳۸۲ زره ډالرو څخه ډیرې، ۲۰۳۰ یورو او ۵۰۰ زره کلدارې مصرف کړي دي.

د دې موسسو د مالي راپورونو له مخې، دا مرسته د خوړو، غیر خوراکي توکو او درملو، روغتیا، تعلیم، مسلکي روزنې، لوړو زده کړو او کارموندنې په برخو کې چمتو شوې وه، او راستنیدونکي کډوال، یتیمان، کونډې، د طبیعي پیښو قربانیان او نور اړمن خلک ترې ګټه پورته کړې ده.

دا مرسته د ۱۴۱ خیریه موسسو لخوا چمتو شوې ده، چې ۶۵ یې په کابل او پاتې نور یې په نورو ولایتونو کې فعال دي.

د یادونې وړ ده چې په تیرو څلورو کلونو کې د طالبانو د واکمنۍ سره، په افغانستان کې له ۲۰ ملیون څخه ډیر خلک د فقر له کرښې څخه ښکته شوي او بشري مرستو ته سخته اړتیا لري.

جمهورخبري آژانس