د خوست ولایت پر اسمان د پاکستان جنګي الوتکې ګزمې کوي

د خوست ولایت اوسیدونکو راپور ورکړ چې د پاکستان جنګي الوتکې د دې ولایت په هوايي حریم کې ګزمې کوي.

د جمهور خبري آژانس د خبر له مخې د خوست ولایت اوسیدونکو نن چهارشنبې (د زمري ۸ مه ) وویل چې د پاکستان جنګي الوتکې د دې ولایت د ځینو ولسوالیو په هوايي ډګر کې په ټیټه ارتفاع کې ګزمې کوي.

دغو پاکستاني جنګي الوتکو تیره شپه (۲۸ اسد) شاوخوا ۱۱:۳۰ بجې څو ځله او په دوامداره توګه ګزمې وکړې.

ځایي اوسیدونکو وویل چې د دې جنګي الوتکو ګزمې دومره ټیټې وې چې دوی یې له خوبه راویښ کړل او د خوست ځینې اوسیدونکي د بمبارۍ له ویرې له خپلو خوب ځایونو څخه ووتل.

دا جنګي الوتکې له پاکستان څخه راغلې وې او شاوخوا څلور یې د شپې تر ناوخته پورې ګزمې کولې.

د طالبانو ډلې تر اوسه په دې اړه څه نه دي ویلي.

جمهورخبري آژانس