په تخار کې د سیلاب له امله ۱۰ کسان مړه او ټپیان شوي دي

په تخار ولایت کې سیمه ییزو طالبانو اعلان وکړ چې په دې ولایت کې د سیلاب له امله ۱۰ کسان مړه او ټپیان شوي دي.

د جمهور خبري آژانس د خبر له مخې د تخار ولایت د فواید عامې ریاست اجرایوي رییس روح الله اکبري د یکشنبې په ورځ (د غبرګولي ۲۵ مه) وویل چې د تخار ولایت په ورسج ولسوالۍ کې د سختو بارانونو او سیلابونو له امله درې کسان مړه او اووه نور ټپیان شوي دي.

هغه وویل چې د تخار ولایت د فواید عامې ریاست څخه یو ماشینري او تخنیکي ټیم سیمې ته لیږل شوی ترڅو د خلکو ستونزې حل کړي.

په ورته وخت کې، د بامیان ولایت سیمه ییزو طالبانو د یکاولنګ د دوهمې ولسوالۍ د ساچک او کالیګان په کلیو کې هم د سیلابونو راپور ورکړی دی.

د بامیان ولایت د والي ویاند صابر فرزان سیغاني وویل چې په دې طبیعي ناورین کې د بریښنا بند، په ساچک کلي کې پنځه استوګنیز کورونه، څو کرنیزې کانالونه او په کالیګان کلي کې سلګونه جریبه کرنیزه ځمکه ویجاړه شوې ده.

هغه وويل چې د طبيعي پېښو سره د مبارزې ولايتي اداره به ژر تر ژره اغېزمنو خلکو ته نغدي، غير نغدي او خوراکي مرستې ورسوي.

جمهورخبري آژانس