طالبانو په کابل، خوست، پروان او پکتیکا ولایتونو کې ۱۴ کسان په دورو ووهل

د طالبانو سترې محکمې اعلان وکړ چې په کابل، خوست، پروان او پکتیکا ولایتونو کې د مخدره توکو د قاچاق، له کوره د تیښتې او غلا په تور ۱۴ کسان په عام محضر کې په دُرو وهل شوي او د بند سزا ورته اورول شوې ده.

د جمهور اژانس د راپور له مخې، د طالبانو سترې محکمې اعلان وکړ چې په کابل ولایت کې نهه کسان د مخدره توکو د قاچاق په تور له ۱۰ څخه تر ۲۰ دُرو او له شپږو څخه تر اوو میاشتو پورې په بند محکوم شوي دي، چې پکې تبلطکا، چرس او زیکاپ ټابلیټونه شامل دي.

دا سزا د خلکو په حضور کې ترسره شوه.

په پروان ولایت کې، یوه ښځه او یو سړی له کوره د تیښتې په تور په ۳۵ دُرو او څلور کاله بند محکوم شوي دي. همدارنګه، په خوست ولایت کې، دوه کسان له ۳۵ څخه تر ۳۹ دُرو او له دوو کلونو او اتو میاشتو پورې د مخدره توکو د قاچاق په تور په بند محکوم شوي دي.

سربېره پردې، په خوست کې د طالبانو یوې ابتدایي محکمې یو کس ته د غلا په تور په عام محضر کې ۳۶ دُرې او دوه کاله بند سزا واوروله. په تېره اونۍ کې، طالبانو په ټول افغانستان کې لږ تر لږه ۴۱ کسان په مختلفو تورونو په عام محضر کې په دُرو وهلي دي.

دا ډله وايي چې دا اقدام د اسلامي شرعي قانون د پلي کولو یوه برخه ده. دا سره له دې چې د بشري حقونو نړیوال سازمانونه په مکرر ډول د بدني سزا او په عامه دُرو وهل غندي، دا یې د بشري حقونو سرغړونه او د شکنجې یوه بیلګه بولي.

په هرصورت، د طالبانو محکمې د داسې مجازاتو او حتی اعدامونو ترسره کولو ته دوام ورکړی دی. دا خبر د بشري حقونو فعالینو ترمنځ له پراخو غبرګونونو سره مخ شوی او د طالبانو په قضایي سیسټم کې یې د عدالت د وضعیت او د مدافعینو د حقونو په اړه اندیښنې راپورته کړې دي.

جمهورخبري آژانس