سیلابونو غزني کې ۲ زره جرېبه ځمکه ویجاړه کړې

د غزني ولایت د طبعي پېښو سره د مبارزې ریاست وايي، سېلابونو دغه ولایت کې ۲ زره جرېبه کرنیزه ځمکه ویجاړه کړې ده.
 
د یاد ریاست په وینا دغه سېلابونه د غزني، خواجه عمري، جغتو، واغظ، خوګیاڼي او رشیدانو ولسوالۍ کې راوتلي وو.
 
د سرچینې په وینا د سېلابونو له امله دغه ولسوالیو کې ۲ زره جرېبه کرنیزه ځمکه ویجاړه شوې او لسګونه کورونه زیانمن شوي دي.
 
دغه راز خبرپاڼه کې دا هم ویل شوي، چې د سېلابونو له امله ۳۰ څاروي هم تلف شوي دي.
 
په دې وروستیو کې د هېواد په ګڼ شمېر ولایتونو کې د سېلابونو راوتلو له امله خلکو ته درانه مالي او ځاني زیانونه اوښتي دي.
 
وردګ یو له هغه ولایتونو څخه دی، چې د تېرو دریو ورځو سېلابونو له امله په کې ۴۰ تنه مړه شوي، ۵۰ تنه لادرکه او ګڼ شمېر نور ټپيان شوي دي.
 
جمهورخبري آژانس