کابل کې ۲۰۰ اړمنو کورنیو ته د خوراکي توکو مرسته ووېشل شوه

د طالبانو ډلې افغان سرې میاشتې په کابل کې د ترکیې د دیني چارو دفتر لخوا ۲۰۰ اړمنو کورنیو ته د خوراکي توکو د مرستې د وېش اعلان وکړ.

د جمهور خبري آژانس د خبر له مخې د افغان سرې میاشتې د رسنیو دفتر تېره شپه (د کب ۵مه) په یوه مطبوعاتي اعلامیه کې وویل چې دوی د کابل په مرکزي مرستندویه مرکز کې ۲۰۰ اړمنو کورنیو ته د خوراکي توکو مرسته ووېشله.

دا مرسته، چې د ترکیې د دیني چارو دفتر په مالي ملاتړ چمتو شوې وه، ۹ مختلف خوراکي توکي پکې شامل وو.

شهاب الدین د ترکیې د دیني چارو دفتر د بشري مرستو ستاینه وکړه او ویې ویل: دا مرسته د اړمنو کورنیو د اساسي اړتیاوو په پوره کولو کې اغیزمنه کیدی شي.

هغه زیاته کړه چې افغان سرې میاشتې، د خپلو بشري مسؤلیتونو پر بنسټ، تل هڅه کوي چې په دوامداره توګه اړمنو، بې وزلو او اغیزمنو کورنیو سره مرسته وکړي.

د ترکیې سفیر وویل چې ترکیه به د افغانستان له خلکو سره خپلې بشري مرستې ته دوام ورکړي او هڅه به وکړي چې د دوستۍ او ورورګلوۍ اړیکې نورې هم پیاوړې کړي.

د دیانت څانګې مشر وویل چې دوی له اړمنو افغانانو سره مرسته خپل دیني او اخلاقي مسؤلیت ګڼي او ټینګار یې وکړ چې په راتلونکي کې به هم له اړمنو او بې وزلو افغانانو سره ورته بشري مرستې دوام ومومي ترڅو اړمنې کورنۍ د ژوند له ستونزو څخه خلاصې شي.

په دې پروسه کې، هرې کورنۍ ته ۲۴ کیلو اوړه، ۱۰ لیتره غوړي، ۸ کیلو وریجې، ۸ کیلو لوبیا، ۱۲ کیلو مکروني، ۲ کیلو چای، ۸ کیلو بوره، ۴ پاکټونه مالګه او ۴ د صابون کڅوړې ورکړل شوې.

جمهورخبري آژانس