سوداګریزې لارې به تر هغه وخته پورې خلاصې نه شي تر څو چې له پاکستان څخه قوي تضمینونه ترلاسه نشي

د طالبانو ویاند وايي دوی به له پاکستان سره سوداګریزې لارې تر هغه وخته پورې خلاصې نه کړي تر څو چې له هغه هیواد څخه قوي تضمینونه ترلاسه نه شي.

د جمهور خبري اژانس د راپور له مخې، د طالبانو ویاند ذبیح الله مجاهد نن پنشنبې (د لیندۍ ۱۳مه) په خپله اېکس پاڼه لیکلي: څرنګه چې د افغانستان او پاکستان ترمنځ سوداګریزې او ټرانزیټي لارې د پاکستاني لوري لخوا د سیاسي او اقتصادي فشار په توګه په غیرقانوني ډول تړل شوي، نو د دواړو خواوو خلکو ته یې جدي زیان رسولی دی.

هغه زیاته کړه: افغانستان د ډیرو نورو هیوادونو څخه خپلې اړتیاوې پوره کوي، د طالبانو امارت پریکړه کړې چې د سوداګرۍ او ټرانزیټ د پراختیا او د دواړو خواوو د خلکو د هوساینې او عزتمندې سوداګرۍ د ډاډمن کولو لپاره، له پاکستان سره سوداګریزې لارې به هغه وخت خلاصې شي کله چې د پاکستان حکومت لخوا قوي تضمینونه ترلاسه شي.

هغه ټینګار وکړ چې دا لارې باید په راتلونکي کې د سیاسي فشار، غیرقانوني ناوړه ګټه اخیستنې او جبر له امله د خلکو پر مخ وتړل نشي، او د دواړو هیوادونو د سوداګرو او خلکو حقونه باید خوندي شي.

د یادونې وړ ده چې د طالبانو سره د تاوتریخوالي وروسته له پاکستان سره د سوداګریزو لارو تړل کیدو د هیواد صادرونکو ته جدي ستونزې رامینځته کړې دي.

جمهورخبري آژانس