کار عملی فاز اول پروژهٔ تولید ده‌هزار میگاوات برق توسط عزیزی گروپ به زودی آغاز می‌شود

 

ملا عبدالغنی برادر معاون اقتصادی گروه طالبان، امروز چهارشنبه(5 سنبله) با میرویس عزیزی، رئیس عمومی شرکت عزیزی انرژی گروپ و تیم تخنیکی آن دیدار کرد.

 

میرویس عزیزی گزارش پیشرفت کار پروژهٔ ده‌هزار میگاوات برق را با معاون اقتصادی ارایه کرده و گفته، پس از امضای تفاهمنامه، تیم‌های خود را همراه با تیم‌های تخنیکی وزارت‌های مربوطه به ولایات بغلان، بلخ، جوزجان، هرات و بامیان اعزام کرده‌اند که در جریان دو هفتهٔ گذشته، سروی ابتدایی شماری از پروژه‌ها را انجام داده و معلومات تخنیکی آن را جمع‌آوری نموده‌اند.

 

وی افزود که پروژهٔ تولید ده‌هزار میگاوات برق بر سه فاز تقسیم شده که فاز اول آن ظرفیت تولید چهار هزار میگاوات برق را خواهد داشت.

 

به اساس معلومات مسؤلین شرکت عزیزی انرژی گروپ، کار عملی پروژه‌های موجود در فاز اول به زودی با همکاری وزارت‌ها و ادارات مربوط آغاز می‌کند.