د طالبانو د کرنې، اوبو لګولو او مالدارۍ وزارت د کندهار ولایت څخه هند ته د ۱۰۰ ټنو وچو انځرونو صادرات اعلان کړل.
د جمهور آژانس د خبر له مخې د طالبانو د کرنې، اوبو لګولو او مالدارۍ وزارت نن یکشنبې (د وږي ۹ مه) په یوه اعلامیه کې وویل چې سږ کال د لومړي ځل لپاره، د ۷۰۰،۰۰۰ امریکایي ډالرو په ارزښت ۱۰۰ ټنه وچې انځرونه له کندهار ولایت څخه هند ته صادر شوي دي.
په اعلامیه کې ویل شوي چې دا اقدام د افغان کرنیزو محصولاتو، په ځانګړې توګه د کندهار د وچو انځرونو د نړیوال بازار موندنې په لور یو مهم ګام ګڼل کیږي.
د یادونې وړ ده چې د کندهار ولایت د کرنې، اوبو لګولو او مالدارۍ وزارت ویاند حنیف حقمل د روان کال د اګست په ۱۷مه وویل چې له دې ولایت څخه بهر ته د انځرونو د صادراتو پروسه پیل شوې ده.
هغه وویل چې په لومړي پړاو کې به ۱۰۰ ټنه انځرونه سعودي عربستان او متحده عربي اماراتو ته صادر شي.
د حقمل په وینا، سږ کال په کندهار کې له ۱۵۰۰۰ هکتاره ځمکې څخه انځر راټول شوي دي، چې د تیر کال په پرتله ۴۰ سلنه زیاتوالی ښیي.
جمهورخبري آژانس
