په غزه باندې د اسراییلو د بې رحمه بریدونو وروسته، د غزې د عامې روغتیا وزارت اعلان وکړ چې په تیرو ۲۴ ساعتونو کې د دې رژیم په وروستیو بریدونو کې لږترلږه ۱۰۰ فلسطینیان شهیدان شوي دي.

د جمهور اژانس د راپور له مخې، د غزې د عامې روغتیا وزارت په حواله د غزې په شمالي سیمو کې د بریدونو شدت دومره زیات شوی چې په دې سیمو کې زیربناوې او ورځنی ژوند په بشپړه توګه ویجاړ شوی دی.

د الجزیرې خبري شبکې راپور ورکړی چې د پرله پسې بمباریو له امله، د غزې شمالي سیمه بې استوګنه او ویجاړه شوې ده، چیرې چې د ژوند هیڅ نښه نه ده پاتې.

په ورته وخت کې، وزارت اعلان وکړ چې په وروستیو ورځو کې، لږترلږه ۸ کسانو، چې ۳ ماشومان هم پکې شامل دي، د لوږې له امله خپل ژوند له لاسه ورکړی دی. راپور زیاتوي چې په غزه کې د لوږې له امله د شهیدانو ټولټال شمیر ۲۳۵ ته رسیدلی، چې له دې ډلې ۱۰۶ یې ماشومان دي.

دا شمېرې په غزه کې د بشري وضعیت د خرابېدو ښکارندویي کوي، چې د اسراییلو د محاصرې او روانو بریدونو له امله په بې ساري بحران کې ډوب شوی دی.

د غزې روغتیا چارواکو خبرداری ورکړی چې د دې وضعیت دوام، په ځانګړې توګه د خوړو او درملو کمښت، کولی شي د شهیدانو په شمیر کې زیاتوالی او د بشري ناورین د زیاتوالي لامل شي.

جمهورخبري آژانس