د طالبانو د فواید عامې وزارت ویاند په تېره اونۍ کې د وزارت د اورګاډي له لارې د ۹۷۰۰۰ ټنو څخه زیاتو توکو د لیږد اعلان وکړ.
د جمهور آژانس د خبر له مخې طالبانو د فواید عامې وزارت ویاند اشرف حق شناس نن دوشنبې (د زمري ۱۳مه) په خپله اېکس پاڼه لیکلي، د زمري له ۳مې څخه تر ۹مې پورې د افغانستان د فواید عامې وزارت د اورګاډي له لارې ۹۷۵۸۷ ټنه توکي لیږدول شوي دي.
طالبانو ویلي چې ۶۴۰۰۸ ټنه توکي د حیرتان بندر له لارې، ۱۳۴۹۷ ټنه د آقینې بندر له لارې، ۱۰۳۵۷ ټنه د تورغونډۍ بندر له لارې او ۹۷۲۵ ټنه د خاف-هرات له لارې لیږدول شوي دي.
دا لیږدونه، چې تیل، غیر تیل او نور مواد پکې شامل دي، هیواد ته وارد او صادر شوي دي.
په ټولیز ډول، د لیږد یوه برخه صادرات دي، چې تیره اونۍ ۱۲۶ ټنه سوداګریز توکي صادر شوي، چې لویه برخه یې وچه میوه ده.
حق شناس وايي، لکه څنګه چې د ریل پټلۍ له لارې د وارداتو او صادراتو کچه لوړیږي، د کار ډیر فرصتونه رامینځته کیږي، ملي عواید زیاتیږي، او د اقتصادي ثبات، پراختیا او ځان بسیاینې لپاره لاره هواره کیږي.
جمهورخبري آژانس
