په پنجشیر ولایت کې ځایي طالبانو اعلان وکړ چې دې ډلې له ولایت څخه له ۲۲۰۰ قیراط څخه زیات زمرد پلورلي دي.
د جمهور آژانس د خبر له مخې د پنجشیر ولایت د والي د رسنیو دفتر نن سې شنبې (د چنګاښ ۲۴ مه) په یوه بیان کې وویل چې د پنجشیر له څلورو کانونو څخه استخراج شوي ۲،۲۳۵ قیراط زمرد د ۱۷۷،۳۵۰ ډالرو په ارزښت د لیلام له لارې سیمه ایزو سوداګرو ته وپلورل شول.
د پنجشیر والي حافظ محمد آغا حکیم ډاډ ورکړ چې د دې کانونو تخنیکي او معیاري استخراج لپاره به جدي او پلان شوي هڅې دوام ولري.
د سیمه ایزې ادارې په نوښت، د کانونو د استخراج د پروسې پیل نه یوازې د ډیرو ځوانانو لپاره د کار زمینه برابره کړې، بلکې په ولایت کې یې پراخه سوداګریز فرصتونه هم رامینځته کړي دي.
د افغان قیمتي ډبرو سوداګرو سربیره، د پنجشیر ځوان سوداګر هم د نن ورځې د لیلام په مراسمو کې حاضر وو.
جمهورخبري آژآنس
