د طالبانو د کورنیو چارو سرپرست وزیر د افغانستان د چارو لپاره د چین او پاکستان له ځانګړو استازو سره وکتل او ویې ویل چې سیمه ییز اقتصادي او سیاسي وده د متقابل تفاهم او درناوي پر بنسټ ترلاسه کیږي.

د جمهور اژانس د راپور له مخې، د طالبانو د کورنیو چارو وزارت د یکشنبې په ورځ (د غوايي ۲۱ مه) په یوه اعلامیه کې وویل چې سرپرست وزیر سراج الدین حقاني په کابل کې د افغانستان د چارو لپاره د چین او پاکستان له ځانګړو استازو سره ولیدل.

طالبانو ویلي چې دا غونډه د چین، افغانستان او پاکستان د بهرنیو چارو وزیرانو ترمنځ د پنځمې غونډې په جریان کې د شویو خبرو اترو تعقیب، د راتلونکې شپږمې غونډې بیاکتنه او د دریواړو لوریو ترمنځ د سیاسي او اقتصادي اړیکو د پراختیا لپاره جوړه شوې وه.

سراج الدین حقاني د سیمې د هېوادونو ترمنځ د اړیکو پر پراختیا ټینګار وکړ او ویې ویل چې د دې ډلې په نظر، سیمه ییز اقتصادي او سیاسي وده د متقابل تفاهم او درناوي پر بنسټ ترلاسه کیږي.

د چین او پاکستان ځانګړو استازو ژمنه وکړه چې له طالبانو سره به ښې اړیکې ټینګوي او متقابل درناوی به پیاوړی کوي او موافقه یې وکړه چې د دریو واړو ګوندونو د بهرنیو چارو وزیرانو شپږمه غونډه به د پخواني ځای ناستي میکانیزم پر بنسټ په کابل کې ترسره شي.

جمهورخبري آژانس