افغان حکومت پر بګرام هوايي اډې شوي موټر بم او ډلیز وسله وال برید ته په غبرګون کې وايي، د تاوتریخوالي د کمولو لپاره اوربند شرط دی.
د
جمهور خبري آژانس د خبر له مخې د بګرام پر هوايي اډه نن چهارشنبې د لیندۍ ۲۰ مه لومړۍ یو موټر بم او وسله وال برید وشو.
د بګرام ولسوالۍ ولسوال عبدالشکور قدوسي ویلي، د دې برید له امله یوه مېرمن وژل شوې او د ښځو او ماشومانو په ګډون ۸۰ تنه نور ټپیان دي.
نوموړي زیاته کړې، د پېښې قربانیان ټول ملکي وګړي دي او د درملنې په موخه د پروان ولایت ملکي روغتون ته لېږدول شوي دي.
قدوسي ویلي ممکن د بریدګرو شمېر له پنځو تر لسو پورې وو.
ارګ دغه برید ته په غبرګون کې وايي، افغان حکومت په وار وار ټینګار کړي، چې په هېواد کې د سولې د ټنګښت لپاره اوربند او د تاوتریخوالي کمول د حکومت او ملت لومړۍ غوښتنه ده.
د ولسمشر ویاند صدیق صدیقي ویلي، که چېرته طالبان تاوتریخوالي ته دوام ورکړي نو افغان امنیتي او دفاعي ځواکونه به د هېواد له تمامي ارضیت او خلکو څخه د دفاع په موخه پر هغوی خپل بریدونه دوامداره وساتي.
که څه هم د ارګ ویاند د دې برید مسوول طالبان بللي، خو طالبانو تر اوسه غبرګون نه دی ښودلی.
جمهورخبري آژانس:کابل