د ملي یووالي حکومت د وزیرانو شورا وروستۍ ناسته کې اجرائیه رییس عبدالله عبدالله د ټاکنو پر روڼتوب او شفافیت ټينګار وکړ.

د جمهور آژانس د خبر له مخې د عبدالله په وینا نن دوشنبې د وږي ۲۵ مه د ملي یووالي حکومت د وزیرانو شورا وروستۍ ناسته ده.

نوموړي و ویل، چې د وزیرانو شورا راتلونکې غونډه به د ټاکنو تر سره کېدو وروسته راتلونکی حکومت او نوی ولسشمر کوي.

عبدالله په دغه ناسته کې د ټاکنو پر شفافیت ټینګار وکړ، او له ټولو حکومتي ادارو یې وغوښتل، چې خپله بې طرفي وساتي.

دغه راز نوموړي پر امنیتي ادارو هم غږ کړی دی چې د ټاکنو امنیت تامین کړي او د کوم ځانګړي نوماند په ګټه له دولتي امکاناتو استفاده و نه کړي.

د افغان حکومت اجرائیه رییس د ټاکنو له خپلواک کمېسیون څخه هم وغوښتل، چې په پوره روڼټوب او عدالت سره ټاکنې تر سره کړي.

جمهورخبري آژانس:کابل