المان غواړي د افغانستان د بیارغونې او کلیو پراختیا وزارت سره د ۵۶ میلیونه یورو مرسته وکړي او دا مرستې به د اوبو رسولو او نورو پروژو په برخه کې ولګول شي.
د
جمهور خبري آژانس د خبر له مخې دغه څرګندونېد آلمان د پراختیایي بانک استازو پرون د غبرګولي لومړۍ نېټه د کلیو پراختیا وزارت له وزیر مجیب الرحمن کریمي سره په یوه ویډیويي کنفرانس کې کړې دي.
د آلمان د پراختیایي بانک استازو ویلي، هېواد یې په پام کې لري چې له افغانستان سره ۵۶ میلیونه یورو مرسته وکړي.
په ورته وخت کریمي د افغانستان او المان اړیکې تاریخې وبللې او د دواړو هېوادونو تر منځ د اړیکو او همکاریو پر لا پراختیا یې ټینګار وکړ.
نوموړي زیاته کړه، چې د آلمان هېواد د ۲۶ میلیون یورو مرستې هوکړه لیک چمتو دی او ډېر ژر به یې لاسلیک کړي.
د هغه په وینا د آلمان د ۲۰ میلیونه یورو مرستې هوکړه به هم ډېر ژر لاسلیک شي او د پاتې لس میلیونه یورو نورې مرستې هوکړه به هم د سږ کال په وروستیو کې لاسلیک شي.
جمهورخبري آژانس:کابل