له افغان سولې سره د پاکستان د همکارۍ ځيني مثبت پیغامونه شته

پاکستان کې افغان سفیر او د ولسمشر ځانګړی استازی حضرت عمر زاخېلوال وايي، له افغان سولې سره د پاکستان د همکارۍ ځیني مثبت پیغامونه او نښې موجودې دي.

د جمهور خبري آژانس د خبر له مخې ښاغلي زاخېلوال له آزادۍ رادیو سره په خبرو کې ویلي، چې دغه مثبتو پیغامونو د لېږد له پاره به دی خپله کابل ته ولاړ شي.

نوموړي د دغه پوښتنې په ځواب کې چې پاکستان د همکارۍ له چمتو دی که څنګه ویلي« بلې هو، وي به، خو دا چې د کابل د پروسې کنفرانس په همدې هدف دی، موږ به پرېږدو چې هغه پیغامونه د هغې لارې د خلکو غوږونو ته ورسېږي.»

د هغه په وینا د دې لپاره چې د سولې په برخه کې پيغامونه په واضح توګه انتقال شي، دی به په خپله کابل ته راشي او موجوده مسایل به له ولسمشر اشرف غني او نړیوالو متحدینو سره شریک کړي.

په ورته وخت کې نوموړي په یوه ټوېټ کې ویلي، چې په کابل کې د ملګرو ملتونو د خاص استازي تدامیچي یاماموتو او د اروپايي ټولنې له سفیر پیېر نایادو سره تېره ورځ کتلي او له دغه دواړو چارو  سره یې په روان وضعیت، سولې او ګډوالو خبرې کړې دي.

اسلام آباد کې افغان سفیر د کابل پروسې د راتلونکې غونډې په اړه هم خبرې کړې او ویلي یې دي، چې غونډې ته به لوړپوړي چارواکي.

ښاغلي زاخېلوال زیاته کړې«اشتراک به په پورته سطحه کې اوسي،خپله کنفرانس به مثبت پیغامونه ولري، مثبت پیغامونه به هم د طالبانو په طرف وي، هم به ولس او هم به پاکستان او سیمې ته اوسي،دا پیغامونه به مثبت او له صداقته ډک وي. زموږ امید دا دی چې دې پیغامونو او طرحې ته چې وړاندې کېږي د سیمې هېوادونه لکه پاکستان لبیک و وايي او د همکارۍ ژمنه وشي.»

باید و ویل شي، چې د راتلونکې اوونۍ په چهارشنبې ورځ به د کابل پروسې ناسته د ۲۵ هېوادونو د لوړپوړو چارواکو په ګډون وشي.

د بهرنیو چارو وزارت مرستیال وزیر حکمت خلیل کرزي په وینا د کابل پروسې غونډې ته به له سولې سره د همکارۍ او د امنیتي ګواښونو د کمولو طرحې وړاندې شي.

جمهورخبري آژانس:کابل