رییس اجرایی وارد تاجیکستان شد
چهارشنبه ۳۰ جوزا ۱۳۹۷ ساعت ۰۸:۵۰
داکتر عبدالله عبدالله رییس اجرایی حکومت وحدت ملی در یک سفر رسمی دو روزه به دعوت قاهر رسول‌زاده نخست وزیر تاجیکستان وارد این کشور شد.
داکتر عبدالله عبدالله رییس اجرایی حکومت وحدت ملی در یک سفر رسمی دو روزه به دعوت قاهر رسول‌زاده نخست وزیر تاجیکستان وارد این کشور شد.
به گزارش خبرگزاری جمهور؛ دفتر مطبوعاتی ریاست اجرایی، امروز چهارشنبه (30 جوزا) با نشر خبرنامه ای گفت که داکتر عبدالله جهت اشتراک در کنفرانس بین‌المللی تحت عنوان "آب برای توسعه پایدار" وارد تاجیکستان شده است.
در این سفر، داکتر عبدالله افزون بر سخنرانی در کنفرانس بین‌المللی "آب برای توسعه پایدار" که هدف آن استفاده خوب و مدیریت آب برای توسعه پایدار است، با امام علی رحمان رییس جمهوری، قاهر رسول‌زاده نخست وزیر و رییس پارلمان جمهوری تاجیکستان دیدار و ملاقات می‌کند.
رییس اجرایی کشور در حاشیه این سفر با رییس جمهوری ترکمنستان، رییس جمهوری پاکستان و تعداد دیگر از مقامات این کشور دیدار می‌کند.
در این سفر موافقتنامه همکاری در عرصه مخابرات، یادداشت تفاهم همکاری در زمینه معادن و اعلامیه مشترک میان مقامات جمهوری اسلامی افغانستان و جمهوری تاجیکستان به امضا می‌رسد و هر دو طرف روی گسترش روابط دوجانبه، تقویت همکاری‌های امنیتی، اقتصادی، اجتماعی، فرهنگی، تجارت، ترانزیت و مبارزه مشترک با تروریزم بحث و گفتگو می‌کنند.
در این سفر وزیر امور داخله ویس احمد برمک، وزیر مخابرات شهزادگل آریوبی، معین سیاسی وزارت امور خارجه حکمت خلیل کرزی، معین وزارت انرژی و آب محمد گل خلمی، معین وزارت اقتصاد محمد اسماعیل رحیمی و معین وزارت معدن و پطرولیم میرجاوید سادات، رییس اجرایی را همراهی می‌کنند.
خبرگزاری جمهور- کابل
کد مطلب: 105388
